Compartir:
0

O VAGALUME, RUBIÁNS E PIÑEIRIÑO GAÑAN O PREMIO ESCOLAR POLAS SÚAS BOAS PRÁCTICAS EN MATERIA DE IGUALDADE

Nos proxectos desenvolvidos ao longo do curso abordaron a temática da violencia de xénero e a visibilidade social e laboral da muller

A Área de Igualdade premia os traballos con 500 euros para cada centro

Participaron 8 comunidades educativas que presentaron 12 propostas de boas prácticas

O proxecto documental integrado: "Mulleres na Historia", do CEIP Rubiáns, o proxecto "Women and professions", do CEIP O Piñeiriño e o proxecto "Contos pola igualdade: A venda de Xulia", da ANPA O Vagalume, foron as boas prácticas merecedoras este ano do Premio para a igualdade na escola que convoca a Área de Igualdade do Concello de Vilagarcía de Arousa. Os proxectos desenvolvidos ao longo do curso abordan de xeito diferente a temática da visibilización da muller no ámbito social e laboral e a violencia de xénero.

"Mulleres na Historia" foi un proxecto promovido dende a Biblioteca do CEIP Rubiáns, no que participaron ao longo do curso todos os departamentos do centro e abarcando dende o primeiro curso de Infantil ata sexto de Primaria. En todas as actividades realizadas polo centro aproveitouse para traballar neste proxecto que tiña como obxectivo fomentar a visibilización do papel da muller na sociedade, para o cal baseáronse nas biografías de mulleres con historias relevantes.

Tamén a visibilidade da muller, pero neste caso, no eido laboral, foi a temática abordada polo CEIP Piñeiriño no proxecto "Women and professions", proposto pola profesora de inglés de sexto curso de Primaria a efectos de continuar avanzando en pro da igualdade de xéneros á vez que os alumnos aprendían vocabulario, gramática e expresión oral en inglés, lingua na que traballaron.

Pola súa banda, a ANPA do vagalume desenvolveu un fermoso traballo "Contos pola igualdade: A venda de Xulia" que tiña como obxectivo loitar contra a violencia e os esterotipos de xénero dende un punto de vista adaptado ás idades dos cativos. Os alumnos foron os encargados de ilustrar os temas que se foron traballando e os debuxos, así como as conclusións recolléronse nun libro.

O xurado, formado pola concelleira en funcións da Área de Igualdade, Ángeles Rodríguez; a concelleira en funcións de Educación, Rocío Llovo; Berta Melio do Consello Local da Muller e Rosina Sobrido do Consello Escolar Municipal, reuníronse o venres pasado, para valorar os 12 proxectos presentados á novena edición do premios escolar. O xurado salientou no fallo ano o elevado novel de todas as propostas, situación que dificultou a toma da decisión final..

Foron un total de 8 comunidades educativas as que participaron este ano no Premio de Igualdade presentando un total de 12 boas prácticas, xa fora a través do profesorado, das ANPAS, ou conxuntamente. Ademais das gañadoras, as outras boas prácticas presentadas foron as seguintes:

"Toda a comunidade a prol da igualdade", da ANPA Doutor Fleming.
"Florece a igualdade", da ANPA Doutor Fleming.
"Os sentimentos e as emocións en Aralde" da EEI Aralde.
"A visibilización da muller en Aralde" da EEI Aralde.
"A corresponsabilidade en Aralde" da EEI Aralde.
"¿Cousas de chicos e cousas de chicas?" do CEIP Rubiáns.
" III xornadas de centros, para unha convivencia positiva" do IES Castro Alobre.
" O patio do recreo: un espazo en igualdade" do CEIP Carril.

Dende a Área de Igualdade queren agradeceron a todas as comunidades educativas o feito de presentarse á novena edición deste premio. Especialmente destacaron o traballo que desenvolveron durante todo o curso escolar para loitar contra as desigualdades entre mulleres e homes, e pola concienciación que cada vez máis, están a tomar nos centros escolares, sobre esta problemática e as súas consecuencias. Igualdade tamén trasladou o seu agradecemento a outros centros que tamén estiveron a traballar neste senso durante o curso, pero que por diversas circunstancias non puideron presentarse ao premio.

O premio ten coma obxectivo principal promocionar a educación en igualdade entre nenos e nenas e máis a erradicación da violencia de xénero dende a comunicade educativa do municipio.

Os criterios que se utilizaron para levar a cabo a valoración foron, en primeiro lugar, a formulación de obxectivos concretos para favorecer a igualdade de xénero dende a escola e a súa coherencia coas actividades que se fixeron, ademais do impacto, a coordinación con outras entidades e entre a propia comunidade educativa, a sustentabilidade no tempo, a innovación do contido e a súa posibilidade de transferencia e o enfoque transversal de xénero ao longo de toda a experiencia.

Publicar un comentario Disqus

 
Top