Compartir:
0
Banda deseñada da vida do autor, na web oficial

CULTURA LEMBRA O VÍNCULO CON VILAGARCÍA DE DÍAZ CASTRO, POETA HOMENAXEADO ESTE ANO NAS LETRAS GALEGAS

O autor de Guitiríz exerceu como profesor do colexio León XIII durante 8 anos

O Salón García acolle o xoves un acto para divulgar a vida e obra do autor cunha conferencia impartida por Santiago Losada, a actuación dos Acordeóns Arosa Bay e un recital poético

Vilagarcía, 8 de abril de 2014.- A Concellería de Cultura organiza unha homenaxe propia a Xosé María Díaz Castro, poeta ao que este ano se lle dedica o Día das Letras Galegas. O acto que se celebrará o xoves no Salón García pretende dar a coñecer a vida e obra do poeta nado en Guitiriz e que mantivo unha intensa relación con Vilagarcía, onde exerceu como profesor no colexio León XXIII durante 8 anos.

A homenaxe organizada polo departamento que dirixe Rocío Llovo inclúe unha conferencia sobre a vida e obra de Díaz Castro a cargo do profesor de Historia da Filosofía, Santiago Losada e que leva por título "Xosé María Díaz Castro; O profesor que ensinou versos en Vilagarcía". A parte musical correrá a cargo do grupo de acordeóns Arosa Bay e tamén haberá un recital de versos do homenaxeado por parte de varias persoas da vila, entre elas, a concelleira de Cultura, Rocío Llovo, e o profesor Xermán Torres. O acto comeza ás 21:00 horas e a entrada é libre e de balde.

Profesor, filósofo, poeta e políglota dunha familia de labregos

O Día das Letras Galegas rende homenaxe a Xosé María Díaz Castro en 2014, ano no que se cumpre o centenario do seu nacemento. Naceu o 19 de febreiro do 1914 en Guitiriz (Lugo) e morreu en Lugo no ano 1990. Procedía dunha familia de labregos e con tan só dezaseis anos publica o seu primeiro poema, en castelán, na revista "Lluvia de rosas"de Tarragona. En 1929 ingresa no Seminario de Mondoñedo, onde cursa tres anos de Latín e Humanidades, outros tres de Filosofía e dous de Teoloxía.

En 1931 publicou, en El Progreso Vilalbés, o primeiro texto en galego, "Lembranzas e sospiros".
En 1936 deixou o Seminario ao ser chamado para incorporarse ao exército. Logo dunha breve estadía na fronte de Asturias, é destinado ao Hospital Militar de Pontevedra.

Rematada a Guerra Civil, 1939, volveu a Mondoñedo e transcorridos uns meses abandonou definitivamente o Seminario para contactar co seu amigo Aquilino Iglesia Alvariño, que dirixía daquela o Colexio León XIII, en Vilagarcía de Arousa. Díaz Castro incorporouse a este centro escolar onde combina a docencia cos seus estudos de Filosofía e Letras.

En 1948 abandona Vilagarcía e trasládase a Madrid onde entrara traballar como tradutor no Ministerio del Interior e, logo, no Instituto de Estudios Hispánicos grazas a que dominaba varias linguas europeas. Nos anos sesenta, trasládase ao Consejo Superior de Investigaciones Científicas, encargándose do servizo de traducións do Instituto Científico y Técnico Juan de la Cierva, concretamente no Centro Experimental del Frío, onde acadará a súa xubilación. Díaz Castro retornou a Galicia en 1982, vivindo en Guitiriz co seu irmán, e morrendo en Lugo en 1990.

Entre a súa obra, salienta o premio frol natural ao mellor poema en castelán que obtivo nos Xogos Florais de Betanzos, 1946, coa composición "El cántico de la ciudad"; e o premio á mellor poesía en galego con "Nascida d’un soño". Nos seus primeiros anos no seminario publica os seus primeiros cadernos de poesía: Follas verdes e Follas ao vento.

Dende Madrid colaborou coa revista Alba, de Vigo, e xa de regreso a Galicia coa publicación Dorna. Tamén foi un importante tradutor, ao galego e ao castelán, de autores como Lamartine, Chesterton, Yeats, Whitman, Rilke... e realizou numerosas críticas de ensaio en revistas e xornais especializados como La Estafeta Literaria e Ínsula. Cando morreu deixou escritos o poemario "Sombras radiantes" e a composición, "Melodía."

O conferenciante

Santiago Losada Carregal, natural de Marín, é licenciado en Teoloxía pola Universidade de Salamanca e profesor de Historia da Filosofía. Ten en común con Díaz Castro que, como este, Losada tamén exerceu a docencia en Vilagarcía, ademais de en centros de Cangas, Santiago de Compostela, Vilagarcía de Arousa, e nos Institutos de Enseñanza Secundaria ‘Pérez Galdós’ e ‘Marqués de Castelar’ de Madrid.

Publicar un comentario Disqus

 
Top