XUVENTUDE ORGANIZA UNHA NOVA EDICIÓN DOS OBRADOIROS URBANOS DE VERÁN PARA FAVORECER A CONCILIACIÓN DE 100 FAMILIAS
Os destinatarios son nenos nados entre 2007 e 2010 que se distribuirán nas sedes dos colexios A Lomba e O Piñeiriño
O prazo de solicitude ábrese o martes, 22 de abril
A Concellería de Xuventude volve a poñer en marcha este verán os Campamentos Urbanos co obxectivo de promover a conciliación da vida laboral e persoal das familias e proporcionar alternativas socio educativas e de lecer aos nenos e nenas de 4 a 7 anos de idade durante as vacacións estivais. O departamento que dirixe Sandra García oferta 100 prazas que se distribuirán nos campamentos que se establecerán nos colexios da Lomba e O Piñeiriño e que funcionará en horario de mañá do 1 de xullo ao 29 de agosto. Os Campamentos Urbanos están dirixidos a nenos e nenas empadroados en Vilagarcía e nados entre os anos 2007 e 2010. O programa de actividades a desenvolver durante os dous meses que dura o programa inclúe obradoiros artísticos, creativos, manualidades, xogos guiados e libres e outro tipo de actividades atractivas e divertidas para os cativos e coas que tamén se pretende fomentar a educación en valores, a convivencia e as relacións sociais.
Como xa se fixo o pasado ano coa finalidade de que as familias poidan adaptarse do mellor xeito posible ás súas necesidades e aos períodos de vacacións dos pais, Xuventude oferta a posibilidade de inscribir aos nenos os dous meses, un só mes ou en diferentes quincenas do período. A cota depende da duración do período elixido e establécense diversas bonificacións. A cota xeral polos dous meses é de 100 euros, 60 por asistir un só mes e 30 euros por quincena.
Bonificacións e gratuidade
Non obstante, establécense reducións do 50% para o segundo irmán inscrito no servizo. As familias numerosas tamén aboarán soamente o 50 por cento das cotas. Ademais, Xuventude reserva 20 prazas dos Campamentos Urbanos para ser adxudicadas en base aos criterios dos Servizos Sociais Municipais entre as familias usuarias que poderán estar exentas do pago das cotas en base ao informe dos técnicos do departamento e á situación socioeconómica da unidade familiar.Prazos de presentación
As familias interesadas deben presentar as súas solicitudes no rexistro Xeral do Concello o 22 de abril e o 2 de maio, de luns a venres entre en horario 8:30 a 14:30 horas e os sábados de 10 a 13 horas. Tamén se poderán rexistrar os escritos de luns a venres polas tardes, de 17 a 20 horas, aínda que neste caso o prazo de presentación será do 22 ao 30 de abril.Os formularios de solicitude, así como as bases nas que figura a documentación que se debe achegar, así como os criterios de baremación e procedemento da adxudicación de prazas, pódense obter nas dependencias da Concellería de Xuventude ou imprimir dende o taboleiro de anuncios da web municipal www.vilagarcia.es.
