FOMENTANDO O TRANSPORTE PÚBLICO EN VILAGARCÍA

CONCELLO E PEREIRA COLABORARÁN PARA FOMENTAR O USO DO TRANSPORTE
PÚBLICO E MELLORA DA MOBILIDADE EN VILAGARCÍA

Preme e Consulta aquí os horarios e destinos de autobuses na GUÍA DE VILAGARCÍA

A esta toma de contacto seguiranlle novos encontros para definir as medidas a adoptar, así como reunións con outros colectivos

Vilagarcía de Arousa, 25 de xullo de 2015.- A mellora da mobilidades no municipio, e especialmente, nos cascos urbanos, é un dos obxectivos marcados polo equipo de Alberto Varela no seu programa de goberno. Segundo as directrices que tamén rexerán a revisión do Plan Xeral de Ordenación Municipal, o alcalde e a edil de Urbanismo, Paola María, mantiveron unha xuntanza cos representantes da empresa local Transportes Pereira coa idea de poñer en común esforzos para promocionar e potenciar o uso do transporte público entre a cidadanía, xa que este é un dos medios que permitiría mellorar a accesibilidade e converter o centro urbano nun espazo onde os protagonista sexan os peóns en lugar dos vehículos.

O rexedor e a responsable de Urbanismo expuxeron esta filosofía aos representantes da empresa familiar, Agustín e María Luisa Pereira, e intercambiaron ideas e opinións sobre a situación actual do transporte público urbano en Vilagarcía e sobre o modelo de cidade accesible, cun centro urbano peonil e libre de tráfico que persegue o goberno socialista, semellante ao que prospera nas principais cidades europeas.

Tanto os edís como os directivos de Pereira comparten a idea de que fomentar o transporte público como alternativa ao uso de vehículos privados é o xeito máis eficaz de eliminar reducir o tráfico das nosas rúas e, como consecuencia, de reducir os niveis de contaminación acústica e medioambiental ligada a este.

Tras este contacto inicial, ámbalas dúas partes quedaron en estudar a situación e volverse a reunir para presentar propostas e ir definindo as medidas concretas a adoptar e a colaboración entre ambos.

O equipo de Varela Paz manterá reunións con outros colectivos e sectores a efectos de traballar nesta mesma liña de mellora da accesibilidade e a mobilidade.