O BNG ACTÚA NA OPOSICIÓN A FAVOR DOS INTERESES DAS E DOS VILAGARCIÁNS
NOTA DE PRENSA:O Bloque Nacionalista Galego, da man da artista Teresa Charlín, vén de propoñerlle ao goberno unha nova actividade amosando, como durante toda esta lexislatura, unha actividade política que sempre tivo como núcleo a defensa dos intereses das veciñas e veciños de Vilagarcía de Arousa.
En coherencia con isto esta organización optou sempre polo diálogo co goberno socialista tratando de mellorar os orzamentos propostos polo grupo de goberno e tendo como centro de atención a mellora das condicións de vida da veciñanza. En concreto atendéronse as necesidades e requirimentos de distintos colectivos de veciños, tales como, entidades culturais, comunidades de montes, asociacións de veciños, colectivos de persoas con diversidade funcional...Como por exemplo o convenio coa asociación Con Eles para a axuda na construción dunha residencia para as persoas con discapacidade intelectual, ou a bolsa para a axuda ao pago do IBI, as axudas ás comunidades de montes, etc.
Do mesmo xeito, o BNG ten o deber de reclamar e defender as melloras ou proxectos que considera que melloran a vida das veciñas e veciños e os que foron comprometidos nos orzamentos municipais e que non foron levados a cabo polo grupo de goberno; como por exemplo a ausencia dalgún grupo galego na actividade Achégate ao Salón, na aposta pola cultura propia que debera representar como mínimo o 60% do investimento nesta área.
Polo tanto dende o noso grupo seguimos a ser coherentes e ante o incumprimento dos acordos adoptados temos a obriga de defender os intereses das persoas e colectivos afectados, como xa manifestou a portavoz no momento que asumiu este cargo. Non obstante, e pese a todo isto, a nosa organización non se negará nunca ao diálogo e ao consenso sempre que sexa en beneficio das nosas veciñas e veciños.
Proba disto é que O Bloque Nacionalista Galego vén de propoñerlle, da man da artista plástica local Teresa Charlín, ao goberno do PSOE, unha actividade que pretende darlle un impulso ao panorama cultural vilagarcián e fomentar a divulgación das artes plásticas a través dunha delegación dun festival.
Nota de prensa BNG Vilagarcía
Suscríbete a Arousa TV por correo
