Marea da Vila continúa avanzando no seu calendario de primarias coa publicación das precandidaturas durante a tarde do xoves 14 de febreiro
Nota de prensa. Vilagarcía de Arousa, a 15 de febreiro de 2019.
Marea da Vila continúa avanzando no seu proceso de primarias para a elaboración da candidatura ás municipais de maio coa publicación na web das precandidaturas durante a tarde do xoves 14. Este venres 15 celebrarase unha asemblea aberta na que as persoas candidatas poderán expoñer a motivación para a súa candidatura en presenza das inscritas. A asemblea terá lugar a partir das 20:00H na sede do Faiado da Memoria (Praza Ravella, 27-1º).
Durante a tarde do xoves 14, Marea da Vila deu a coñecer as persoas que participan nas súas primarias que se celebrarán entre o venres o sábado, e cuxa proclamación definitiva será o luns 18. O Comité Electoral informou de que só existe unha candidatura a encabezar a lista, a de María de la O Fernández, nacida en Cornazo e mestra do CEIP Rubiáns. Acompañan a súa candidatura outras 14 persoas, a primeira delas outra muller, Andrea Obenza Pérez, politóloga e moi destacada no movemento xuvenil de Vilagarcía. As outras tres persoas que as acompañan entre os 5 primeiros son Lucas Medas Herbojo, Licenciado en Administración e Dirección de Empresas pola Universidade de Vigo e músico; Ana Olveira Blanco, consultora e investigadora en economía social; José María Lorenzo Villaverde , licenciado en xornalismo e en dereito pola Universidade de Santiago de Compostela, é doutor en dereito pola Universidade de Copenhague en Dinamarca.
Dende Marea da Vila mostrámonos satisfeitas por un proceso que se está celebrando nos niveis de esixencia en canto a transparencia, igualdade, cooperación e radicalidade democrática que nos puxemos como meta principal. Animamos ás persoas que acrediten destes principios e se sintan representadas no que expresamos no Manifesto Fundacional de Marea da Vila, a que participen da asemblea desta tarde e das votacións que se realizarán esta fin de semana. Marea da Vila é un proxecto vivo, aberto á cidadanía e feminista. De aquí a maio seguiremos sumando a xente para que sexa ademais un proxecto representativo da diversidade de Vilagarcía e as súas parroquias.
