Manifesto 8M do Consello Local da Muller

Manifesto do Concello Local da Muller de Vilagarcía de Arousa. 8 de Marzo: Día Internacional da Muller Traballadora 

Hoxe, 8 de marzo, Día Internacional da Muller Traballadora, queremos unha vez máis facernos escoitar e reivindicar os nosos dereitos, queremos facer visible a importancia das mulleres na sociedade, como traballadoras, como coidadoras, como estudantes, como piares fundamentais da sociedade.

Levamos anos manifestando o noso rexeitamento a todas as formas de discriminación que sufrimos as mulleres día a día por razón de idade, de procedencia, de clase, de orientación sexual, de identidade de xénero, e queremos reivindicar e esixir o noso dereito a participar en igualdade na sociedade, na cultura, na economía ou mesmo nas relacións.

Non podemos negar que ao longo das últimas décadas houbo algún avance en materia de igualdade, pero temos que denunciar que a realidade actual non é nada esperanzadora xa que as mulleres estamos a sufrir en maior medida as consecuencias da crise.

A precariedade no ámbito laboral aféctanos de xeito especial. A feminización do paro segue en aumento e a fenda salarial é inaceptable. As mulleres cobramos en España un 29’1% menos que os homes, segundo o informe "Brecha salarial y techo de cristal" elaborado polos técnicos de Facenda. O mesmo informe sinala que serán necesarias case sete décadas para acabar con esta fenda salarial e tamén engade que dende o ano 2014 a fenda foi en aumento.

Hai unha masiva feminización dos contratos a tempo parcial. A falta de recursos públicos de coidado e a persistencia das prácticas culturais patriarcais, obrígannos a asumir maioritariamente os permisos e excedencias por coidado e iso limita as nosas posibilidades de desenvolvemento profesional e provoca a merma dos nosos dereitos e prestacións sociais. O 71% das pensións que están por debaixo do salario mínimo interprofesional son de mulleres, polo que as mulleres pensionistas somos cada vez máis pobres.

A educación é un dos piares básicos dunha sociedade. Temos a obriga de educar en igualdade, educar en valores non adscritos a un sexo determinado e sen estereotipos. Temos que continuar esta loita que comezaron hai moito tempo outras mulleres como Emilia Pardo Bazán, Concepción Arenal e Clara Campoamor, que fixeron visible a valía da muller nun tempo onde eramos invisibles aos ollos da sociedade.

A imaxe da muller é denigrada día a día en todos os ámbitos, tamén nos medios de comunicación, onde os esterotipos e o sexismo están á orde do día non só coas imaxes ou as mensaxes que transmiten, senón tamén no tipo de vocabulario que empregan.

Queda moito por facer e seguimos a loitar. Hoxe 8 de marzo, as mulleres de todo o mundo estamos convocadas á FOLGA FEMINISTA. Xuntas, hoxe, paramos o mundo para dicir basta.

Non pode haber unha sociedade xusta se non se eliminan os comportamentos e actitudes machistas contra as mulleres en todos os ámbitos: laboral, social, familiar… e se non se elimina a manifestación máis terrible de todos eles, os asasinatos e agresións da violencia machista.

QUERÉMONOS VIVAS E LIBRES, non queremos máis mortes nin máis violencia contra nós.

Esiximos que sexa aprobado XA o decreto lei que ten que dotar economicamente o Pacto de Estado contra a Violencia de xénero, e que se empece a aplicar de inmediato.

Esiximos que se visibilice e recoñeza o valor e a dignidade do traballo doméstico e de coidados, e se realice en condicións de corresponsabilidade e sexa asumido, polo tanto, coma unha responsabilidade de todas e todos, da sociedade e do Estado.

Dende o Consello Local da Muller de Vilagarcía sumámonos a Folga Feminista do 8 de marzo, e solicitámoslle á Corporación Municipal que apoie esta convocatoria de folga sumándose ás reivindicacións da mesma.


Consello Local da Muller de Vilagarcía de Arousa
Suscríbete a Arousa TV por correo
Etiquetas:

Publicar un comentario

[blogger]

MKRdezign

Formulario de contacto

Nombre

Correo electrónico *

Mensaje *

Con la tecnología de Blogger.
Javascript DisablePlease Enable Javascript To See All Widget