Os usuarios da biblioteca de Vilagarcía saen á rúa para protestar polas deficiencias do edificio en Rey Daviña


Performance protesta en Vilagarcía 'Grupo de estudo e lectura itinerante'

Nota de prensa: 
A través dun “grupo de estudo e lectura itinerante” buscamos protestar polo mal estado da biblioteca municipal. A inacción do goberno ante varias mocións aprobadas e as súas propostas electorais levanos a saír á rúa a estudar e a ler. Sentados, en silencio.





Todo comezou cunha recollida de sinaturas e unha consulta no pasado pleno municipal.

Non descartamos pedir unha xuntanza, urxente, co propio alcalde para que nos explique por que en 4  anos non se fixo nada que realmente solucione os problemas da nosa biblioteca municipal.

Queixámonos en primeiro lugar do mal estado da rede sen fíos, das poucas conexións para os enchufes e da dispoñibilidade horaria . Se ben é certo que a biblioteca oferta 12 horas de luns a venres, de que nos vale ás estudantes se vamos a ter que pasar un cuarto dese tempo intentando conectarnos á wifi ou esperando que as páxinas carguen?

Pídese unha ampliación de horario, sobre todo nas fines de semana e que se poña en consideración un horario nocturno en datas sinaladas. Tanto para o alumnado universitario, como para o dos institutos ou das FP, que reside en Vilagarcía.

Ademáis destas queixas é fundamental destacar o número mínimo de sitios para estudantes que ten a biblioteca e que non se adecúa á demanda. A biblioteca dispón de espazo suficiente para ser mellor utilizado , só por citar un exemplo, o espazo para lectoras de novas e xornais que ten baixa ou nula demanda polas tardes e podería adecuarse ás datas dos exames das estudantes.

Outras queixas que tamén se recolleron a medida que pasou a folla de sinaturas foron as de a baixa conexión á electricidade e luminosidade da que dispón a biblioteca, como os ruídos que se producen por certos actos culturais que sumado ao demáis provocan unha atmósfera de malestar, en definitiva, un sitio pésimo para situala biblioteca.

Os baños están nun estado lamentable dado que están sobreutilizados dadas as características “multiusos” do edificio. Vemos como solución que se limpen dúas veces ao día. Tamén que se indique con pictogramas que na segunda planta da biblioteca existen aseos que se poderían utilizar tranquilamente.

Estudar nesta biblioteca convértese nunha batalla, cando debería presentarse como un sitio cómodo e adecuado para o traballo estudantil.


Conexión coas parroquias e transporte público  

Tamén queremos destacar que os estudantes que viven fora do centro non dispoñen de horarios suficientes de transporte público e ten un prezo moi pouco económico para poder empregar a biblioteca habitualmente durante a semana.

Modernizar a biblioteca 

Sería interesante modernizar a biblioteca de forma virtual. Un catálogo electrónico que mostre tamén a dispoñibilidade ou existencia dos libros que permita aos usuarios aforrarse unha viaxe ou incluso solicitar novos exemplares que enriquezan a biblioteca.

Rogamos que despois desta demanda histórica se activen os mecanismos de actuación para mellorar a calidade da biblioteca."



Suscríbete a Arousa TV por correo

Comentarios

comenta! :)

Archivo

Formulario de contacto

Enviar