Vilagarcía en Común denuncia a acumulación de residuos procedentes das podas, limpezas viarias e de praias no Polígono do Pousadoiro 


A formación protesta polo perigo que supón a proximidade destes refugallos ó manancial de Fontegudín


Vilagarcia en Común denuncia a acumulación de residuos procedentes das podas, limpezas viarias e de praias no Polígono do Pousadoiro. A formación amosa o seu malestar por unha acumulación de refugallos que se sitúa sobre o principal abastecemento de agua potable do que beben as vivendas de Cea. Un novo exemplo do ineficaz e irregular tratamento de residuos impulsado polo goberno local do PSOE para o que o espazo político que encabeza Jesús López esixe solucións.

Hai algúns días Vilagarcía En Común denunciaba a acumulación de residuos procedentes da obra de humanización da Praza da Independencia nunha parcela cercana aos supermercados das Carolinas. Unha actuación irresponsable coa que o Concello ignora o marco legal e as súas obrigas no que a tratamento de residuos se refire; e que supón ademais unha ameaza ambiental e para a saúde pública polo risco que eses restos sen tratar implican para os acuíferos cercanos.

A formación que encabeza Jesús López ten agora constancia de que non é este o único depósito de residuos sen tratar que o goberno local está a realizar. Pois tamén os restos das limpezas que realizan no Concello, tales como podas de árbores ou actuacións similares, están a acumularse noutra parcela do Polígono do Pousadoiro, pertencente a unha empresa que na actualidade non ten actividade.

Vilagarcía en Común amosa a súa preocupación polas consecuencias que ese acopio de refugallos poida ter na calidade da agua que chega aos fogares da poboación local. E é que o nomeado depósito atópase enriba do principal abastecedor da auga potable que chega ás casas de Cea, que é o manancial de Fontegudín. Cabe destacar o risco que isto supón para a saúde destes veciños, así como o innecesario da situación, posto que existen múltiples formas de desfacerse dos refugallos derivados destas accións.

A formación denuncia a irresponsable actuación do Goberno de Alberto Varela. Un proceder que amosa o desleixo do grupo socialista, e que pode acarrexar diversos problemas de salubridade e calidade ambiental. Vilagarcía en Común esixe que o Concello solvente a situación coa máxima urxencia, e insta ao goberno local a actuar de forma adecuada e a retirar os residuos xa vertidos para darlles un uso e tratamento adecuado, utilizando os medios e a maquinaria apropiados para a xestión dos residuos.

Nota de prensa Vilagarcía En Común
20 de febreiro de 2019


Suscríbete a Arousa TV por correo
 
Top