Vilagarcía en Común presentará medio centenar de propostas da veciñanza no seu programa

Vilagarcía en Común trasladará ao seu programa máis de medio cento de propostas dos asistentes ao seu acto de presentación. 

As achegas da cidadanía serán o eixo fundamental para a elaboración da proposta programática da formación para as municipais


Vilagarcía en Común inicia a elaboración do programa co que concorrerá ás próximas eleccións municipais co foco posto na cidadanía. As achegas da veciñanza serán o eixo sobre o que se asente unha proposta programática participativa e centrada nas inquedanzas e necesidades da poboación local. Un xeito de facer co que a formación quere dar exemplo da política de servizo público na que cre; e que se contrapón ás campañas baseadas en falsas promesas electorais e en palabras baleiras de contido, como a protagonizada polo equipo do PSOE nos anteriores comicios.

Vilagarcía en Común xa ten incorporado ao seu programa electoral, actualmente en proceso de elaboración, o máis de medio cento de propostas achegadas polo público que asistiu ao acto de presentación da formación. A participación e o constante contacto coa cidadanía será a base dun xeito de facer co que o novo espazo político aspira a dar forma a unha proposta integradora, que satisfaga as necesidades do conxunto da veciñanza e que non deixe a ninguén á marxe. Trátase “de contar con toda a veciñanza, tamén coa do rural, para elaborar as políticas municipais. Queremos realizar unha proposta participativa seria, que supere as falsas promesas electorais para ser unha realidade na xestión diaria”, explica En Común.

A formación que encabeza Jesús López bota a vista atrás para lembrar as promesas incumpridas que o actual alcalde empregou na anterior campaña. Como o concelleiro 22 ou a realización duns orzamentos participativos que xamais chegaron a materializarse. Un exemplo da política de despacho, desvinculada das peticións e inquedanzas da rúa, que Vilagarcía en Común ve necesario desterrar de Ravella.

Logo de ter feito súa esa primeira tanda de propostas cidadás recollidas no acto de presentación celebrado no Auditorio, Vilagarcía en Común xa está a traballar na elaboración dun calendario que lle permitirá recoller as demandas e iniciativas de toda a veciñanza de Vilagarcía. Logo da primeira xuntanza mantida con veciños de San Roque, nas próximas semanas a formación continuará cunha intensa xira de xuntanzas e contactos cos distintos colectivos, que prestará especial atención ás necesidades do rural.

Vilagarcía en Común celebra e agradece o éxito de participación acadado no acto de presentación do proxecto, no que boa parte dos asistentes trasladaron as súas propostas á candidatura. Un mecanismo de participación que a formación repetirá en todas e cada unha das súas futuras actividades. O novo espazo inicia a súa andadura co compromiso explícito de converter a relación directa coa veciñanza no elemento central das súas políticas, favorecendo en todo momento os mecanismos para que o feedback coa xente se manteña e se convirta na folla de ruta que permita establecer as actuación prioritarias para Vilagarcía.

Nota de prensa Vilagarcía en Común 
21 de febreiro de 2019


Suscríbete a Arousa TV por correo

Comentarios

comenta! :)

Archivo

Formulario de contacto

Enviar